Landa-Albertia-Orratxeta-Isuskitza

Landako inguruko pagadietatik korrikaldi lasaia egin dut gaurkoan; asko dira Uribarriko urtegiaren inguruan egin daitezkeen ekintzak, baina Albertia mendiko basoetan zehar galtzea irteera aberasgarrienetako bat da duda barik.
Etxe-Zuri jatetxean hasita, "Vasco-Navarro" edo Tren Txikito zeritzon trenaren bideari jarraitu diot, Albertia mendira daraman xendra topatu dudan arte. Bide honek, igoera lasai batean, basozainaren etxe ondotik igarota "Campa de Las Manzanillas" izeneko zelaira garamatza. Han, Legutioko gudan eroritako gudarien oroimenezko eskultura topatzen da.
Pago zaharren artean bidean gora eginez, ANVren omenezko eskultura dagoen gailurrera iritsi naiz: Albertia. Bira eman diot ondoren gailurrari, bidezidor polit batetik dolinen artean zigi-zaga eginez, Gerra Zibileko lubakiak topatuz "Campa de las Manzanillas" erako bidean. Handik, Pagolako sakanera jeitsi naiz, bide erdian Orratxetako kobazuloa topatuz, inguru paregabea benetan! Sokak eskegita aurkitzen dira pareta ikusgarri hauetan, espeologoen lurraldean gaudela iragarriz.
Sakanean behera Pagola ibaia jarraitu dut, Isuskitza mendira daraman xendra topatu dudan arte. Pagadi ederren artean berriz, aldapan gora, lehenago orein batzuk ikusi izan baditut, oraingoan bisoi baten antzeko animalia ikusi dut. Berdin dio gaur erritmoa lasaia izatea, kristona gozatzen ari bainaiz!!
Mendi bizikletek landutako bidezidor eder bati jarraituz Isuskitza mendiaren gailurrera iritsi naiz; bai, hau "BTT-Ero" - en lurraldea bada ere. Eta lan aparta egiten ari dira inguruan xendra polit politak bizirik mantenduz.
Gailurretik "Vía Crucis" a jarraituz jeitsi naiz Landara berriz, belauneko arazoengatik erritmoa mantxotuz, baina kristona gozatuz berriro ere, Uribarriko urtegiaren ikuspegiak direla medio. Hala iritsi naiz Etxe-Zuri jatetxera berriro, kafesne bero bat disfrutatuz orain, irteera eder honen sari ezin hobea.